Johannes 17:17-19: “Heilig hulle deur U waarheid; U woord is die waarheid. Soos U My in die wêreld ingestuur het, het Ek hulle ook in die wêreld ingestuur. En ter wille van hulle heilig Ek Myself, sodat hulle ook deur die waarheid geheilig kan wees.”

Solank ons as gelowiges in hierdie wêreld leef, gaan ons op een of ander manier teen die stroom van die wêreld se stelsel inswem. Dis net hoe dit is. Ons gaan druk ervaar, moeilikhede, probleme, versoekings en geleenthede om verkeerde dinge te doen. Dis deel van die lewe. Maar in al hierdie dinge – omdat Jesus die wêreld oorwin het en deur geloof in ons woon – is ons ook soos Hy … oorwinnaars. As Jesus nie die wêreld oorwin het nie, sou ons ook nie kon nie. Maar Hy het, en daarom kan ons. Dis altyd waar: omdat Jesus dit gedoen het, kan ons dit ook doen. Omdat Jesus gebuig het in gebed (Lukas 22:41), kan ons ook in geregtigheid buig.

In Johannes 14:18 sê Jesus: “Ek sal julle nie as wese agterlaat nie; Ek kom weer na julle toe.” Dit beteken God gaan nie toelaat dat ons alleen agterbly of verlate voel nie. As Hy iets sê, dan bedoel Hy dit. God maak nie grappies nie. Jesus het altyd reguit gepraat – Hy was nie vaag of dubbelsinnig nie. Dít is wat goeie grense wys. En omdat Jesus goeie grense gehad het, kan ons ook leer om goeie grense te hê.

Omdat Jesus die wêreld en alles wat daarmee saamkom – soos aanloklikhede, skinderstories, gemor, oordeel, veroordeling en begeertes – van die hand gewys het, kan ons ook keer dat die wêreld ’n plek in ons lewens kry. Hy het die pad vir ons gebaan – heeltemal, sonder om ooit te struikel. Omdat Jesus ons eerste liefgehad het, kan ons Hom liefhê. Omdat Hy vry was, kan ons ook vry wees. Niemand hoef vasgevang te bly in slegte gewoontes of in die mag van die dood nie.

Hier is iets om oor te gesels: Dink jy God gaan mense wat Hom nie liefhet nie, in die hemel toelaat? Het jy Jesus werklik lief? Verlang jy regtig daarna om Hom te ken – die Een wat vir jou gesterf en opgestaan het? Wat sê jou gewete daaroor? Wees eerlik… die rou, ongefilterde waarheid.

Dit gebeur gereeld dat gelowiges in Christus geskok is wanneer ’n bekende Christen of leraar in sonde vasgevang word. Selfs mense wat die Waarheid ken, kan in die moeilikheid beland as hulle nie toelaat dat God se liefde diep wortel skiet in hulle lewens nie – en as hulle, hulle honger na Jesus verloor het. As ons nie versigtig is nie, kan ons die waarheid begin opdeel – dit net tot sekere dele van ons lewens toelaat – en dan mis ons hoe eg en werklik God werklik is. Dan bly dit by “kopkennis”, maar dit bereik nie ons harte nie.

Ware heiligmaking gebeur wanneer ons toelaat dat God se reinigende waarheid elke area van ons lewe binnekom – elke kamer, elke hoekie. Dit beteken daar is nie plekke waar ons vir God sê: “Hier mag U nie inkom nie.” Maar die waarheid is, God sien alles in elk geval. Dis nie asof daar enigiets is wat Sy oog ontglip nie. Hy is nie ’n halfblinde Koning nie, en Hy sukkel beslis nie met sy sig nie. Hy sien alles, altyd.

So maak daardie deure oop. Sê vir Hom wat regtig in jou hart aangaan. Vra Hom die moeilike vrae – jy moet weet Hy gaan nie terugdeins vir eerlike gesprekke nie. Stil twyfel word nooit beantwoord nie. Gee daaraan ’n stem. Soms moet óns self hoor wat ons eintlik dink – praat dit uit. God se ore is oop en Hy luister.

Omdat Jesus ’n oorwinnaar was, kan ons ook oorwin! In werklikheid het die Here gesê ons is meer as oorwinnaars (Romeine 8:37) – ons moet dit net begin leef.

Innerlike vryheid is soms net ’n geselsie met God vêr.
“Gesels net ’n bietjie met Jesus, vertel Hom van al jou moeilikheid.
Hy hoor selfs jou stilste sug, en Hy sal op Sy tyd antwoord.
Jy voel hoe die gebedswiel draai, en jy weet daar’s ’n vuur wat begin brand.
’n Geselsie met Jesus maak dinge baie beter.”

-Vertaling“Have a Little Talk with Jesus,” geskryf deur Cleavant                        Derricks in          1940.

Baie dankie dat jy geluister het – ek is Social Porter van Living In His Name Ministries.

Hierdie vertaling is gedoen deur Chané de Clercq