Vertalersnota: Die skrywer praat vanuit ’n Amerikaanse perspektief. Met “ons land” bedoel hy die Verenigde State van Amerika, en met “ons regering” die Amerikaanse regering. Alle geldbedrae is in Amerikaanse dollar (USD).

Ken jy daardie onrustige, senuweeagtige gevoel wanneer jy bang is vir wat dalk voorlê? Dis wat ek met “bewing” bedoel. Ek hou ook van hierdie beskrywing: “teësinnig bewe”. Daar sit iets van onrus in die woord, daardie voorgevoel dat daar dalk moeilikheid op pad is. In 1940 het die Circleville Herald, ’n koerant in Ohio, geskryf: “Europa bewe vandag steeds. Mense is gespanne, bekommerd en bang oor hoe dit sal afloop. Militêre kenners voorspel dat dit die grootste veldslag in die wêreldgeskiedenis sal wees.” Die hele Europa het dus gebewe by die gedagte aan oorlog en bloedvergieting. En soos ons almal weet, het die Tweede Wêreldoorlog kort daarna gevolg. Dié oorlog het byna die hele wêreld in ’n rampspoedige stryd gedompel. En dan praat ek nie eens van die onsekerheid oor wat van almal sou word nie. Mense was oorweldig deur al daardie onsekerheid!

Mense is gespanne. Bekommerd. Bang. Party bewe en weet nie eens hoekom nie. Die meeste besef nie regtig wat alles aan die skud is nie. Dit gebeur in hulle harte, in hulle gedagtes en selfs in die grond onder hulle voete. Dis asof daar oral tegelyk klein aardbewings is … in die letterlike sin, in ons geestelike lewe en ook figuurlik. Wat die werklike aardbewings betref, is dit moeilik om die syfers te ignoreer. IRIS volg aardbewings soos hulle gebeur. Volgens dié organisasie was daar in 2005 wêreldwyd gemiddeld minder as 300 aardbewings elke dertig dae. Teen 2011 was dit sowat 350 tot 400. In een maand van 2013 was daar 794 aardbewings met ’n magnitude van 4,0 of hoër. En in Desember 2025? Daar was 1 449. In net een maand! Man, hier word behoorlik geskud, en dan praat ek net van wat onder ons voete gebeur.

Ek is Social Porter en jy luister na Outposts. Hier speel ons lekker jazz en gesels ons oor dinge wat ’n mens laat dink. Vanaand praat ons oor “’n Nasie wat bewe”. Of dalk moet ek sê “Nasies wat bewe”, want vir die eerste keer in die geskiedenis bewe al die nasies van die aarde tegelyk.

Ek wil nie vanaand te veel politiek by hierdie onderwerp insleep nie. Ek sê dit sommer vooraf, sodat julle weet ek probeer niemand oorreed om vir enigiemand anders as Jesus Christus te stem nie.

Bly ingeskakel. Ons is oor ’n oomblik terug.

Stan Reynolds van Sage Point Financial, Inc. skryf:

In Amerika in 1970 was goud $35 per ons, petrol 0,20 sent per gelling en ’n gemiddelde huis $15 000. Die totale skuld was $2 biljoen.

In Amerika in 2012 is goud $1 700 per ons, petrol $4 per gelling en ’n gemiddelde huis $170 000. Die totale skuld is $16 biljoen.

In Amerika in 2025 kos goud gemiddeld $3 435 per ons, en op dae wanneer die prys hoog is, is dit sowat $4 300 tot $4 500 per ons. Petrol het gemiddeld $3,10 per gelling gekos, ’n gemiddelde huis kos sowat $410 000 en die totale skuld is sowat $37,6 biljoen.

Mnr. Reynolds het verder gesê:

Verlede Augustus was dit 57 jaar sedert ons regering van die goudstandaard afgestap het. Toe ons die dollar van goud losgemaak het, kon die regering baie vryer met die dollar omgaan. MAAR ongelukkig kon geen regering nog ooit die versoeking weerstaan om daardie mag te gebruik om geld uit te gee wat hy nie het nie. Nie in enige land, enige plek op aarde of enige tyd in die geskiedenis nie. ’n Regering bestaan maar net uit mense, nes die res van ons in hierdie nasie wat bewe en onseker en senuweeagtig is. En soos die res van ons wil hulle uit selfsug dinge hê sonder om die volle pynlike prys daarvoor te betaal.

In 2012 het ons land $3,8 biljoen per jaar uitgegee, terwyl dit net sowat $2,5 biljoen ingekry het. Dit beteken ons moet $1,3 biljoen leen.

Dit was in 2012. Nou is dit 2025. Dinge het beslis verbeter, al hang dit af van wat jy met “beter” bedoel. Maar ons gee steeds baie meer uit as wat ons inkry. En al het die huidige regering dinge verbeter, hou ons self aan met dieselfde gewoontes wat die land in 2008 op sy knieë gebring het. Nou doen ons dit sommer met nuwe ywer. As ons oor die algemeen ons geld swak bestuur, is dit nie “hulle” skuld nie. Elkeen van ons maak sy eie keuses, en soveel mense is gedurig net een salaris weg daarvan om op straat te beland.

Goed, ek weet dis baie syfers. Moenie nou die draad verloor nie. Bly by my.

Laat ek mnr. Reynolds verder aanhaal:

Die ENIGSTE deel waarvoor die Kongres ’n begroting kan opstel, sluit alles in wat ons regering noem, byvoorbeeld hoofweë, gesondheidsdienste, die weermag, howe, die FBI, die CIA, ensovoorts. Die bedrag wat hulle gaan uitgee, is eerlikwaar so verbysterend groot dat ek dit nie kan begryp nie. Dit beteken dat ons vanjaar elke dollar waarvoor die Kongres begroot, moet leen om al die regeringsfunksies aan die gang te hou.

Op hierdie stadium is daar net twee maniere om die begroting te laat klop. Die eerste is om elke staatsdepartement te sluit, van die weermag en die Departement van Vervoer tot die FDA. Ek bedoel om hulle toe te maak, nie net om vir ’n rukkie stil te staan nie!

OF

Verhoog ALMAL se belasting met 50%!

Onthou, dié program is in 2012 geskryf, so hou jou kalm. Maar terug by die punt. Daar is geen geld oor nie. Ons het alles uitgegee en toe baie meer geleen as wat ons uitgegee het. As ons van 2025 af vorentoe kyk, sal die volgende president, en dit maak nie saak WIE dit is nie, hierdie nasie nie weer op koers kan kry sonder dat ons almal baie pyn moet verduur nie.

Laat ek byvoeg dat Amerika as geheel onwillig is om sulke pyn, of eintlik enige pyn, te aanvaar. Daarom sal ons maar moet vat wat die leiers ons gee. Ons wens hulle was nie aan die stuur nie, maar ons het hulle self daar gesit.

Kom ons bring dit nou na vandag toe. Ons kan aanhou om die vinger na die regering te wys tot ons blou is, maar op die ou end moet elkeen van ons verander hoe ons ons eie lewe bestuur. Ek weet nie van jou nie, maar sonder Christus is ek hoegenaamd nie slim genoeg om die lewe op my eie aan te pak nie. Ons het Jesus nodig.

Ek glo Stan praat BAIE reguit oor iets waarvoor die Amerikaanse publiek BAIE blind is, of hulle dit nou doelbewus miskyk of nie. Hierdie feite maak ’n mens onrustig. Dalk is dit juis een van die hoofredes waarom dit voel asof die grond onder ons almal skud …

Dit is feitlik onmoontlik om iets van mense weg te neem nadat dit aan hulle belowe is en hulle dit so lank al ontvang het. Gewoonlik volg daar onluste en chaos op straat en in die regering. Dalk sal dit help om meer geld te druk, maar op die ou end is dit maar net groen ink op wit papier. Ek sê vir jou, wanneer mense besef, ek bedoel régtig besef, dat hulle nie veilig is nie, kan byna enigiets gebeur. Toe die kalender van 1999 na 2000 oorslaan, het baie mense skielik gesê: “Ek voel nie veilig nie.” Ek onthou hoe ek gedink het: Julle maak seker ’n grap! Julle was voorheen ook nie veilig nie, en sonder Christus was julle gevoel van veiligheid net dit … ’n illusie. Ander het weer gesê: “Dit voel vir my asof Grootboet luister.” Maak hulle ’n grap? Grootboet het die hele tyd geluister. Die verskil is dat julle dit nou eers begin besef. En die ergste? Toe hulle uitvind dat iemand hulle dophou en afluister, het dit hulle later nie eens meer geskeel nie. Solank hulle gratis kos, onderwys, gratis universiteitsopleiding en behuising gekry het, het hulle stilswyend die regering se optrede goedgekeur.

Hoe hanteer ons dit op ’n praktiese, biddende en waaksame manier sonder om paniekerig te raak en te oorreageer? Dis ’n goeie vraag. Dit is maklik om 2 Kronieke 7:14 aan te haal:

As My volk, wat na My Naam genoem word, hulle verootmoedig en bid en My aangesig soek en hulle van hulle verkeerde weë bekeer, sal Ek uit die hemel hoor en hulle sonde vergewe en hulle land genees.

God het dit gesê en dit is die volle waarheid. Maar ek is redelik seker dat “hulle land genees” nie beteken dat ons almal ’n maklike lewe gaan hê, lekkernye gaan eet, op mallemeules gaan ry en in die maanlig gaan droom nie. Ek twyfel opreg of God se idee van herstel beteken dat Hy ons harte en gedagtes gaan terugbring na ons ou houding van “kom ons laat God buite”. Wanneer die meeste mense dié Skrifgedeelte aanhaal, dink hulle volgens my terug aan ’n sonnige, sorgelose, byna betowerende tyd in hulle lewe. Toe het dit gevoel asof alles reg was en iemand na hulle omgesien het. Hulle hoop om van ons moeilikheid weg te kom asof ’n mens dit net kan agterlaat deur met vakansie te gaan. Wat ons nie besef nie, is dat alles vandag anders is, selfs al kon ons teruggaan na die tyd toe “alles nog reg was”. Ou vriende het aanbeweeg, ons het self verander, paaie het verander, besighede het mettertyd verdwyn en nuwes het hulle plek ingeneem. Die ou familiehuis is lankal weg en op die plaas staan daar nou ’n winkelsentrum of ’n parkeerterrein. Daar is geen pad terug nie.

Kom ons kyk na ’n tydperk van omtrent tien jaar om te sien hoe dinge verloop het toe ons as nasie God doelbewus begin uitsluit het. Dit het omstreeks 1960 tot 1963 begin. Tussen 1962 en 1973 het tienerswangerskappe met 400% toegeneem, seksueel oordraagbare siektes met 272% en die aantal seksueel aktiewe tieners met byna 400%. Inhegtenisnemings weens moord onder 13- tot 18-jariges het met 230% toegeneem. Geweldsmisdaad oor die algemeen het met meer as 400% toegeneem, aangemelde kindermishandeling het met 330% opgeskiet, en die lys hou net aan. En hier is een wat jou sal laat regop sit. Sedert Viagra op die mark gekom het, het seksueel oordraagbare siektes onder mans ouer as 55 met meer as 600% opgeskiet. Ja, 600%.

Ek is jammer, maar dis waar ons sonder die Here staan, en van hier af gaan dit net verder agteruit. Sonder die liefde, beskerming en leiding van Jesus in ons lewens kan die samelewing en almal daarin net verder afdraand gaan totdat hulle hulleself vernietig.

So hier sit ons almal, bekommerd oor wat voorlê. Al die onsekerheid hou ons snags wakker, ons harte bewe van die senuwees, en die wêreld om ons verander van oomblik tot oomblik. Daar hang so ’n vreemde spanning in die lug. Het jy dit al opgelet? Dis asof alles en almal bewe, party van angs en party van verwagting. Soos ek gesê het, hier word behoorlik geskud!

Soveel mense kan nie slaap nie. Daarom het hulle dokter toe gegaan en ’n voorskrif vir ’n pil, ’n slaapmiddel, gekry, sonder om hulle enigsins aan die newe-effekte te steur. Ek maak nie ’n grap nie. Ek het nou die dag ’n advertensie van die een of ander farmaseutiese maatskappy gesien. Met ’n kalm, strelende stem sê dit: “As jy nie kan slaap nie, as jy rondrol en jou angs hoog loop, kan ons help. Een pil per dag hou angs weg.” Ek het by myself gedink: Julle maak seker ’n grap! Moenie jou emosies hanteer nie, hemeltjie, nee, hoekom sou jy dít wou doen? Drink net ’n pil en daar gaan jy, reguit droomland toe. Nooit te hoog nie, nooit te laag nie, altyd rustig in die middel. Jy sal soos ’n kind slaap! Maggies! En hoeveel mense dink dis alles ’n goeie idee? Het hulle ooit gelees wat die verskriklike newe-effekte op kort termyn is, om nie eens te praat van die newe-effekte van langdurige gebruik nie?

Een van die FDA se doelwitte is om seker te maak dat medisyne wat in dié land bemark word, veilig en doeltreffend is. Maar kom nou, het jy al daardie newe-effekte gelees? Goeiste! Die newe-effekte van soveel medisyne wat deur die FDA goedgekeur is, is verskriklik. Trouens, dit is so erg dat dit amper komies is om die lys te lees. As ek medisyne neem wat my deur my vel laat bloei, is dit volgens my beslis GLAD NIE veilig nie. Dikwels lyk dit vir my of die newe-effekte veel erger is as wat die middel doeltreffend is. Tog het die regeringsagentskap wat toesig hou dit as veilig en doeltreffend goedgekeur. Veilig volgens wie? Volgens hulle winsmarge?

Baie mense is elke dag oor alles so angstig dat hulle letterlik van binne bewe. Hulle neem medisyne om hulle angs en depressie te verlig. Hulle gebruik dit so lank dat hulle later daarvan afhanklik is om enigsins in die samelewing te kan funksioneer. Ons is bang om winkel toe te gaan, om die huis te verlaat, om in die openbaar rond te loop. Ons is bang mense sien ons raak, en ons is bang hulle sien ons nie raak nie. Ons is onrustig oor ons geldsake, of omdat ons nie geld het nie. Dis ongelooflik hoeveel mense bang is om enigiemand naby aan hulle toe te laat uit vrees vir wat daardie persoon dalk van hulle sal uitvind. Dit gebeur regoor die land. Glo jy my nie? Doen jou eie opname. Luister mooi na die mense met wie jy praat, en jy sal begin hoor hoe dieselfde dinge telkens na vore kom.

Hebreërs 12:26–27

… hierdie keer sal Hy ook die hemel skud. Hy het dit baie duidelik vir ons gesê: “Een laaste skudding, van bo tot onder, van voor tot agter.” Die woorde “nog een keer” dui daarop dat die dinge wat geskud word, dit wil sê die dinge wat gemaak is, weggeneem sal word, sodat die dinge wat nie geskud kan word nie, kan bly staan.

Maar te midde van al die geskud, terwyl ons van binne bewe en met knellende onsekerhede en vrese sit, moet ons aan Kolossense 3:1–3 vashou:

As julle dan saam met Christus opgewek is, soek die dinge daarbo, waar Christus aan die regterhand van God sit. Rig julle gedagtes op die dinge daarbo, nie op die dinge op die aarde nie. Want julle het gesterf, en julle lewe is saam met Christus in God verborge.

Is dit moontlik dat soveel mense in ons nasie tot diep in hulle harte bewe omdat ons as nasie nie meer na God luister of op Hom vertrou nie? Is mense so onrustig en bang omdat hulle oor die algemeen nie glo nie? Glo ons nie regtig dat God is wie Hy sê Hy is nie, en is ons maar tevrede om soos toeriste deur die Christelike geloof te stap? Is ons tevrede om net op die strand rond te loop en interessante goed te soek, sonder om ooit die water in te gaan? Wanneer gaan ons almal saam ons oë op Jesus rig? Weet jy, ons hoef nie te wag tot die hemel op ons neerval voordat ons ons na die Here draai en Hom omhels nie.

Die meeste mense slaan sommer die boek Daniël oor. Jy kan dit letterlik én figuurlik lees. Dit praat reguit, maar party dinge is ook nogal raaiselagtig. Die meeste mense verstaan dit blykbaar nie. Daar is dele wat ek self ook nie verstaan nie. Dan doen ons maar wat ons gewoonlik doen wanneer ons iets nie verstaan nie. Ons glimlag, beweeg aan en bly stil.

Ek hoop net julle druk nie julle ore toe nie. Laat ek vir julle ’n Skrifgedeelte lees wat baie mense ongemaklik maak.

Daniël 12:1–3

In daardie tyd sal Migael opstaan, die groot vors wat oor die kinders van jou volk waghou. Daar sal ’n tyd van benoudheid wees soos daar tot op daardie tyd nog nooit was vandat daar ’n nasie bestaan het nie. En in daardie tyd sal jou volk gered word, elkeen wie se naam in die boek geskryf staan.

Baie van dié wat in die stof van die aarde slaap, sal wakker word, party tot die ewige lewe en ander tot skande en ewige veragting. ³ Dié wat wys is, sal skyn soos die helder hemelgewelf, en dié wat baie mense na geregtigheid lei, sal vir altyd en ewig soos die sterre skyn.

Hmm … glo jy ons leef in die laaste dae? En moenie luister na mense wat jou probeer manipuleer deur die betekenis van belangrike woorde te verander sodat ou profesieë by hulle eie agenda pas nie. Ons het gepraat oor hoe ons bang geword en begin bewe het, maar hoe bring ons die vrees en bewing in ons harte tot stilstand? Ons moet die bloeding stop. Daniël 12:1–3 sê basies dat God se mense hulle getuienis voor ander moet laat skyn en mense in die laaste dae na Christus moet lei. Hy sê verder in vers 10:

Baie sal gereinig, wit gemaak en gelouter word, maar die goddeloses sal goddeloos optree. Nie een van die goddeloses sal verstaan nie, maar dié wat wys is, sal verstaan.

In die laaste dae sal bose mense aanhou om kwaad te doen en in die duisternis te leef. Maar God se mense sal verstaan wat werklik aangaan. God se mense sal nie in vrees en verwarring leef nie, maar sal die wysheid en insig hê om in ’n wêreld vol onrus en verandering te leef. Ons moet ’n hegte verhouding met God hê en groot dinge in Sy Naam doen. Dit is nie genoeg om bloot naby Jesus te wees nie. Ons moet Hom regtig leer ken en elke dag saam met Hom deur die lewe stap. Daniël 12:12a sê: “Geseënd is hy wat wag.”

Die nasies woed en die grond bly onder ons voete skuif. Maar om te wag beteken nie dat ons maar net stilsit en niks doen nie. Dis juis daar waar krag uitgeruil word. Die God wat die hemel skud, is dieselfde Een wat Sy mense standvastig maak. Hy het ons nie alleen in die donker laat raai nie. Hy het ons Sy Woord en Sy Gees gegee, en Jesus self is by ons om ons staande te hou. Wanneer alles om ons onvas voel, bly Hy die een vaste punt.

Fokus op die Here. Rig jou oë op Hom.

Psalm 123:2

Kyk, soos die oë van dienaars op die hand van hulle meesters gerig is, soos die oë van ’n diensmeisie op die hand van haar meesteres gerig is, so is ons oë op die HERE ons God gerig, totdat Hy kom en Hom oor ons ontferm.

Ons sal krag kry wanneer ons op die Here wag! In Titus 2:12–14 sê Paulus dat ons:

… in hierdie teenswoordige wêreld met selfbeheersing, opregtheid en godsvrug moet leef, terwyl ons wag op die salige hoop, die heerlike verskyning van ons groot God en Verlosser, Jesus Christus. Hy het Homself vir ons gegee om ons van alle ongeregtigheid los te koop en vir Homself ’n eie volk te reinig wat gretig is om goed te doen.

Daar het jy dit. Deur Jesus kom die bewing in ons harte en gedagtes tot stilstand. Hy alleen is ons steun en ons pilaar. Hy is ons hoop. In ’n wêreld wat aanhou skud, bly Hy ongeskud. Jesus alleen, Jesus alleen, en daar is geen ander nie. Dink daaroor.

Josua 1:9, ”

Het Ek jou nie beveel nie? Wees sterk en vol moed. Moenie bang of moedeloos wees nie, want die HERE jou God is by jou waar jy ook al gaan.

Dankie dat julle hier by Outposts by my aangesluit het, ’n lekker plek langs die Ockluhwahhah-rivier, waar die bome saggies oor die rivier se oewer leun en elke aand aangenaam is. Ek is Social Porter en hierdie program is moontlik gemaak deur Living In His Name Ministries, Area 22 Guitars, juffrou Jackson by die De-Luxe Beauty Shop, Frank Edney by die Hot Spot Cafe, Bruce en Mildred Harrell daar in Flemingstraat, die wonderlike Paul Powers en natuurlik ons geliefde Jeff en Karen by Trinity Bakers, waar daar altyd iets lekkers in die oond is.

Moenie dat al die bewing in ons land jou onderkry nie. Dit is geen toeval dat hierdie dinge gebeur nie. Nie een, ek herhaal, nie een van die knellende onsekerhede van vandag gebeur toevallig nie. Die Here het lank, lank gelede reeds op hierdie dae gewys, so laat ons nie verbaas wees nie. Jesus is ons fontein en ons fondament, nie die strukture of planne van mense nie. Hy staan bo alles. Hy oortref “alle dinge”. Hy is heilig en regverdig, bo alle selfstandige naamwoorde, alle voornaamwoorde, alle byvoeglike naamwoorde, alle naamvalle en getalle, alle maniere van doen, metodes, tye en seisoene, en bo alle titels, posisies en platforms. Spreuke 8:22–31. Hy is die aangestelde Een, die uitstraling van God se heerlikheid en die beeld van God se wese. Hy doen alle dinge deur die krag van Sy Woord, Hy bring reiniging van sonde, en Hy sit aan die regterhand van die Vader en die Heilige Gees en regeer volkome oor die heelal. Oor alle dinge.

Hy, Jesus, is waar ons begin en waar ons eindig. Elke keer, sonder uitsondering, is dit Jesus, en daar is geen ander nie. Hou vas aan Hom en aan Hom alleen. Moenie aan jou vriende, jou werk, jou pastoor of jou ideale vasklou nie. Hou vas aan Jesus. Wees gerus, Hy weet presies wat om te doen, en dit is presies wat Hy sal doen. Kom ons vertrou met ons hele hart daarop. Wat ’n wonderlike gedagte, né?

Tot ons weer ontmoet, wees geseënd en wys. Amen!

Vertaal deur Chané de Clercq Walker.